أمير قطر يلبس العباءة الخليجية للنجم الأرجنتيني ليونيل ميسي، الحركة اللي عملها الامير “تميم” مع “ليونيل ميسي” لما لبّسه بشت عربي، لا هيا دعاية لقطر ولا ماركتينج للعبايات ولا مؤامرة ولا اجبار ولا واخد فلوس ولا اي حاجة من الكلام ده، انما دا طقس سلطاني او مرسوم عربي تاريخي قديم اسمه “الخلع السلطانية” ..
موروث عربي ثقافي سلطاني بحت، وبدايته كانت ان شيخ قبيلة “قبل الاسلام” يخلع عباءته ويلبسها لشيخ تاني او وجيه او اي شخص قدم “نفيلة” في حق القبيلة بتاعته، ولو تفتكروا ان النبي لما جاله كعب بن زهير ومدحه، خلع النبي بردته واهداها لكعب، ونفس البردة بردو المشهورة بقصيدة “البردة” للبوصيري، وظلت عادة متوارثة بين الخلفاء والحكام لحد ما بقت اشبه بمرسوم ملكي لتعيين امير على اقليم او منصب، خصوصا في عهد دولة المماليك هنا في مصر والشام.
أمير قطر يلبس العباءة الخليجية للنجم الأرجنتيني ليونيل ميسي
وهتلاقي المؤرخين امثال المقريزي لما بيوصفوا تعيين امير في مكان ما، بيقول “خلع عليه” السلطان امارة كذا او اقليم كذا، يعني عينه في المنصب، والتعيين بيتم انه يوزع الخلع السلطانية عالامراء، وكل خلعة قيمتها من قيمة الوظيفة نفسها، كل ما كان الرداء اغلى كل ما كان المنصب اعلى، وفي الاعياد والمناسبات الرسمية كان السلطان بينزل يصلي العيد ومعاه “متعهد الخلع”، وبعد الصلاة وبداية الاحتفالات ياخد منه خلع “من خزانة الخلع” ويوزع على الامراء والوجهاء كتكريم ليهم، وهكذا.
لماذا لبس ميسي العباءة
بعد تحولها لمرسوم، مكنش لازم يخلعها من عليه، انما بيكون فيه مصنع مخصوص للخلع دي، يعمل منها كتير ويهديها للسلطان، والسلطان يخلع على اي امير من الخلع دي زي ماهو عايز، كفاية بس يلبسهاله بنفسه، دا بيكون قرار ملكي بتكريمه او تعيينه في منصب كبير في القصر.
- اما ان يخلع السلطان خلعته ويلبسها لحد، او انه يديله من “الخلع السلطانية” اللي معاه.
- بالاضافة لانه مرسوم تعيين، الا انه كان اعلى مراسم التكريم كمان.
- يعني شاعر مثلا مدح الخليفة، فارس اوقف مؤامرة عالسلطان.
- قائد اوقف مجاعة او وباء، او حل مشكلة، يكون تكريمه بالخلعة السلطانية بجانب التخصيص والفلوس والدهب وخلافه.
- ابن خلدون في المقدمة بيقول : “الخلعة في الأصل لباس مصنوع في دار الطراز
- من الحرير أو الديباج أو الإبريسيم، محكم الصنع.
- يلبسه السلطان، ويخلعه على بعض الأشخاص قصد تشريفهم بذلك، أو لولاية وظيف من وظائف الدولة”.
شاهد أيضًا: ماذا قال لاعبو المغرب عند استقبالهم من الملك محمد السادس؟
- اللي عمله تميم في البطولة هو طقس عربي يمثل الشرق كله بإمتياز، كنوع من التكريم الملكي او السلطاني لقائد الفريق الفائز.
- زيه بالظبط زي ما ملك انجلترا على سبيل المثال لو عايز يكرم حد او يديله لقب “سير”.
- بيجيب السيف ويلمس بيه كتف المراد تكريمه وهوا راكع على ركبته.
- طقس ملكي انجليزي قديم هو كمان بس محدش بيعترض عليه عشان سياسة “التغريب” وكل ماهو غربي فهو جميل.
- – بإختصار، الامير تميم كممثل عن العرب في كاس العالم، “خلع على” القائد ميسي خلعة سلطانية رسمية.
- بقصد تكريمه على العادة العربية فقط كقائد فريقه وفائز بالكأس.
- تكريم مخطط له، من قلب الثقافة العربية، لا اكثر ولا اقل .
زورونا على الفيس هنا.
